今日(28日)沙田馬場除有一級賽2400米冠軍暨遮打盃外，另一焦點落在第十場三班1200米的「舞林密碼」，此駒馬主正是藝人郭富城(城城)，他攜同太太方媛，以及兩名囡囡Chantelle及Charlotte入場觀戰，為愛駒打氣，可惜的是，「舞林密碼」再次屈居第二，未能打開在港勝門。

　城城旗下新馬「舞林密碼」今日作在港第2次上陣，列陣第十場三班1200米，續配何澤堯操刀。城城今日特別帶同太太方媛以及兩個囡囡，全家總動員入場打氣。

　在賽事開跑前，城城與方媛一齊到馬匹亮相圈睇馬，並與練馬師方嘉柏、騎師何澤堯交談一輪，城城表現親民，同場不少馬主上前要求合照，都是來者不拒。被問及爭勝信心，城城握著拳頭並說「盡量」。

　賽事展開，郭氏夫婦與兩名囡囡一齊到馬主廂房欄邊觀戰。兩名囡囡身穿花裙、同樣戴上太陽眼鏡，並手持賽馬公仔，相當可愛。「舞林密碼」出閘處身前列，直路發力衝刺，可惜已被領放馬「魅力寶駒」走甩，最終繼上場直路賽之後，再次屈居亞軍，仍與勝仗無緣，城城賽後多少帶點失望，要拉頭馬唯有等下一場了！ （文、圖、影片：志誠）