今日（3日）凌晨3時許，橫頭磡邨宏耀樓一單位突然起火，冒出大量濃煙，火光熊熊，居民發現報警，約300人逃至地下暫避。消防到場將火救熄，起火單位在17樓，姓劉（35歲）男戶主事發時發現抽濕機起火嘗試救火但不成功，手腳及面部燒傷，與29歲妻及母親逃生，3人均需送院；另一名66歲婦亦感不適送院。經初步調查後，懷疑肇事單位內抽濕機電線短路引起火警，起火原因無可疑。

    有居民在走火警後於網上留言：「2026/3/3凌晨三點半左右，嗰陣未瞓，聽到消防鐘響，即刻去騎樓聞吓有冇啲咩異味，點知聞到燒燶咗嘅膠味，知大鑊，即刻叫媽子過嚟，佢都話佢聞到。呢個時候已經想落樓，但係媽子話可能一陣就冇。打開個門一睇，點知見到兩邊有少少白煙，二話不說即刻叫醒老竇一齊衝落樓，後尾發現原來係樓下嗰層火燭，行緊樓梯嘅時候已經見到消防員，真係勁快！見到佢哋準備帶氧氣罩入去濃煙度，個刻覺得消防員真係好偉大。行緊樓梯落去嘅途中見到……攬住BB仔嘅媽咪，冇着鞋嘅𡃁仔，扶住欄杆心急落樓嘅伯伯，落到去地下見到好多人，樓下嘅人向上面大叫，火燭呀快啲走啊，火燭呀快啲走啊，火燭呀快啲走啊。而落到樓下嘅人攬住嘅可能就係佢哋呢一生最寶貴的東西，狗，電腦，長者，背囊……

    呢次突如其來嘅火燭，真係令我睇到好多嘢，多年冇講嘢嘅鄰居喺呢一刻互相慰問，已安全嘅人擔心其他人，萬幸嘅係好彩冇聽到有人大叫XXX仲喺上。最後提醒大家，如果遇到火災第一時間整濕毛巾，拎鎖匙，電話走人，願冇人受傷。」（記者 區天海）