屯門景峰花園今日（17日）凌晨發生火警，有住客在睡夢中被鄰居拍門喚醒，抱着愛貓及時逃生，慨歎「驚到腳軟！」感謝鄰居及時通知；另有居民指揹着老父走火警，驚慌加上體力透支，表示氣喘如牛咳嗽得想嘔吐，網民紛紛送上祝福，並著樓主要感謝鄰居救命之恩。

   涉事居民留言：「凌晨3點，有人拍門話火警，訓緊覺完全聽唔到有火警鐘，如果無鄰居拍門，真係完全唔知要走。一開門，全部都係煙，先知係真火警……之後即刻拎貓入袋，隻貓驚到哩左入沙發底，捉左5分鐘，行樓梯係愈行愈大煙好臭好辛苦，原來，有危險既當下，個人係完全比唔到反應，驚到腳軟呆左頭腦空白……不過，人無事，已經係最好嘅事，唉。」

   網民留言說：「你真係要多謝你鄰居救命之恩！」「多謝好鄰居，人同貓都平安無事就好啦。」「見到你同貓貓平安照……眼濕濕……因為知呢個唔係防火演習……好好彩。」

   一位居民留言說逃生經過：「啱啱慌到唔太正常發到力，仲要咩（孭）老豆落樓，攰到一邊咩一邊嘔咳，原來人唔一定病先會不能自控，心頭震緊嘅慌亂狀態我差d以為個身體同大腦都好似唔屬於我自己。」另一位居民則說：「消防拍門帶着我們住客疏散，走到樓下真的腳仔震，又凍又驚，聞咗的煙味，現在喉嚨都有些不適！大家真的要小心火種！」

   網民回應：「你都好叻，混亂嘅當下你仲可以孭到你老竇係出到去先發現自己唔知做咗咩，好似斷咗片，咁真係驚到傻咗。」（記者 區天海）