上周六（30日）晚上，尖沙咀海濱上空逾百無人機在夜空中上演一場浪漫求婚表演，社交平台流傳多段影片，短短數分鐘，無人機化作玫瑰花、人像下跪求婚、「I love you」、「Marry Me」、「Tonight love writes itself across the sky and into eternity（今夜，愛在天空書寫，直至永恆。）」等羅曼蒂克字句。

    求婚事件迅即成為城中熱話，女主角其後在社交平台留言：「YESSSSSSSSS」，回應：「我願意」，網民送上祝福；她更帖出多張與未婚夫合照。網民激讚：「無得輸！師兄型爆！」、「咁浪漫，好sweet！」、「童話成真，係咪霸總？」

    女主角在社交平台留言：「我其實大概估到會被求婚，但我無諗過最後個 surprise 會大成咁……事後聽返fiancé （omg this term！）講，成個構思來自於《分分鐘需要你》：由兩個人一齊搭住火箭出發，到太空睇流星，再係天空寫下 『Love writes itself across the sky and into eternity.』

    聽到呢度，我先發現最感動嘅其實唔係無人機有幾多架、場面有幾震撼。而係有人願意花咁多心思，將一首上世紀嘅情歌、一個故事、一份感情，變成一個屬於我哋嘅宇宙。

    而最意想不到嘅係原來有咁多人同我哋一齊經歷咗呢一晚：有人喺行行吓海旁見到、有人食食吓飯邂逅到，有人喺 Threads 留言祝福…多謝你地成為左我地故事嘅一部分，多謝你地嘅靚相，希望有生之年，真係可以一齊去太空睇星星，而喺去到嗰日之前，希望我哋都繼續好好去愛、好好被愛。亦願呢份愛可以送俾每一個願意相信美好嘅人。」（記者 區天海）